Karabinierët italianë në rajonin e Anagni arrestuan një 23-vjeçar shqiptar në trafik kokaine. Aksioni u krye dy ditë më parë gjatë një patrullimi përgjatë “Via Casilina”.
Efektivët vunë re një makinë me dy persona brenda, e cila pasi pa patrullën, bëri një kthesë në formë U-je, me qëllim që t’i shmangej kontrollit. Karabinierët urdhëruan menjëherë që automjeti të ndalonte, duke e kapur atë në zonën Osteria della Fontana.
Gjatë kontrollit, 23-vjeçari, i ulur në sediljen e pasagjerit, u përpoq pa sukses të hiqte qafe një pako të fshehur në xhaketën e tij. Karabiniertë e ndaluan dhe gjatë kontrollit gjetën 14 doza kokainë, me peshë afërsisht 7 gramë, së bashku me 440 euro cash.
I riu u arrestua dhe u vu në dispozicion të autoriteteve gjyqësore, ndërsa bashkëpunëtori i tij, një 38-vjeçar po shqiptar që drejtonte automjetin, u raportua në arrati. Kontrolli është pjesë e një fushate më të gjerë nga Karabinierët Anagni kundër trafikimit dhe shpërndarjes së drogës në të gjithë zonën.
Vonë në mëngjesin e së shtunës, Gjykata e Frosinone-s e vlerësoi arrestimin, duke e konsideruar të ligjshëm, dhe lëshoi një urdhër dëbimi për shtetasin shqiptar, informon media itlaiane. Masa u zbatua po atë ditë duke e shoqëruar atë në Zyrën e Imigracionit të Shtabit të Policisë së Frosinone-s dhe më pas në qendrën e parë të pritjes në Potenza, në pritje të largimit të tij nga Italia.
