Kamala Harris do të hyjë në historinë e Shteteve të Bashkuara si e para grua me ngjyrë në postin e zëvendëspresidentes. Jill Biden, gruaja e presidenti të zgjedhur Joe Biden pritet të marrë rolin e Zonjës së Parë. Ndërsa, bashkëshorteve të zv/presidentëve të mëparshëm u është caktuar roli i ‘Zonjës së Dytë’.
Por në këtë rast gjithçka ndryshon. SHBA do të ketë për herë të parë, një ‘Zotëri të Dytë’. Burri i Harris, Doug Emhoff, do të jetë “Zotëria i Dytë i SHBA-së”. Avokati 56-vjeçar nga Kalifornia, i cili është edhe baba i dy fëmijëve, është gjithashtu personi i parë hebre që merr rolin e “bashkëshortit të dytë”. Kamala Harris u lind në Oakland të Kalifornisë (1964) nga dy prindër emigrantë, nëna me origjinë indiane dhe babai i lindur në Xhamajka. Pas shkurorëzimit të prindërve, Harris u rrit kryesisht nga nëna e saj hindu, Shyamala Gopalan Harris, një studiuese për kancerin dhe aktiviste për të drejtat civile.
