Mes duatrokitjesh të panumërta dhe lotëve që nuk shteronin, trupi i pajetë i presidentit të Fax News, Kasem Hysenbelli është përcjellë për në banesën e fundit. Shumë miq, gazetarë, njerëz të botës së biznesit, politikës, ishin të pranishëm për ti dhënë lamtumirën e fundit, arkitektit të medias së lirë dhe të pavarur, që ishte gjithmonë në krah të popullit të lirë. Stafi i Fax News dhe Fax Web, të trishtuar thellë për këtë largim, hodhën karafila të bardhë dhe kuq, ndërkohë që trupi i pajetë i Kasem Hysenbellit nxirrej nga banesa.
Drejtor Kasemi iku në heshtje, duke lënë pas vlerësime pafund për figurën dhe integritetin në raport me njerëzit e medias dhe jo vetëm, ndërkohë që largimi i tij fizik duket ende i pabesueshme për stafin që ruan në mendje zërin dhe këshillat e tij të drejta. Të pafund ishin komentet në rrjet për një personalitet si Kasem Hysenbelli, ku dhjetëra gazetarë ruanin në kujtime vetëm mirësinë e njeriut të guximshëm të medias dhe qytetarit që investoi dhe kotribuoi për vendin e tij nëpërmjet një media të lirë e cila u bë një dritare e shtuar për të gjithë shqiptarët.
Të gjithë janë të një mendimi, humbja e Kasem Hysenbelliut është një humbje e madhe për mediat shqiptare, për qytetarinë dhe për vetë demokracinë e medias, pasi ai ishte një misionar i së vërtetës, dhe pasionant i fjalës së lirë. Fax News dhe Fax Web, mediat të cilat krijoi Kasem Hysenbelli, vetëm në pak vite u bënë shtëpia e fjalës së lirë, për çdo qytetar të thjeshtë, të cilët jo në pak raste e konsideronin si “televizioni i së vertetës”. Kasem Hysenbelli u nda nga jeta me 5 dhjetor, pas një betejë të vështirë prej disa javësh me sëmundjen e COVID-19, në një spital në Turqi, duke lënë pas një dhimbje të fortë, por në kujtime e secilit do të mbahet mend me humorin e hollë.
