Një pallat në zonën e Astirit në Tiranë është përfshirë nga flakët e zjarrit në orët e para të mëngjesit sot. Si pasojë e zjarrit janë lënduar tetë banorë , të cilët janë shkuar për mjekim në spital. Pasi kanë marrë ndihmën mjekësorë janë larguar nga spital. janë djegur dhe katër makina
Sipas policisë zjarri ka shpërthyer në garazhin e pallatit në Unazë të Re, rruga “Aleksandri i Maqedonisë”.
Një nga banorët e pallatit ka treguar momentet e tmerrit dhe vështirësitë me të cilat është përballur ndërsa tentoi të dilte jashtë.
“Mbrëmë ra zjarri, isha në gjumë.
Dëgjova një zhurmë ndoshta plasën motorrat poshtë. Kur dola tek dera korridori ishte mbushur me tym, drita nuk kishim, me zor ndeza dritën e telefonit. Kur dola poshtë nëpër shkallë pashë që i gjithë pallati kishte zbritur dhe unë e gruaja ishim të fundit.
Zbritja nëpër shkallë ishte e rrezikshme sepse të merrej fryma nga tymi. Poshtë qëndruam deri në orën 02:00 se erdhën policia e zjarrfikëset. Tymi ishte shpërndarë edhe në pallatin tjetër, zjarrfikëset vunë shkallët dhe nxorën nga katet e larta familjarët që rrezikoheshin. Zjarrfikësja ka reaguar shpejt”, ka deklaruar banori për News 24.
Njoftimi i policisë Më datë 21.06.2022, në Unazë të Re, në rrugën “Aleksandri i Maqedonisë”, në orët e para të mëngjesit ka rënë zjarr në një garazh dhe janë djegur 4 automjete.
Si pasojë e zjarrit, janë dëmtuar lehtë dhe kanë shkuar për mjekim në spital shtetasit A. Xh., 28 vjeçe, F. J., 23 vjeçe, D. J., 27 vjeçe, I. Xh., 31 vjeçe, E. Xh., 27 vjeç, E. K., 35 vjeçe, M. B., 48 vjeçe dhe N. B., 50 vjeç, të cilët pasi kanë marrë ndihmën e parë mjekësore, janë larguar. Grupi hetimor po punon për sqarimin e rrethanave të ngjarjes.
