Një vatër zjarri është shfaqur sot në masivin pyjor të fshatit Neshtë në Njësinë Administrative Orenjë të Bashkisë së Librazhdit. Mësohet se nga zjarri janë djegur të paktën 3 ha pyje. Përhapja e flakëve në të gjitha drejtimet ka shkaktuar dëme jashtëzakonisht të mëdha.
Me gjithë ndërhyrjen e shpejtë të komunitetit, të shërbimit zjarrfikës dhe atij pyjor vënia nën kontroll e flakëve ka qenë mjaft e vështirë për shkak të mbizotërimit të erës së fortë dhe terrenit malor. Vetëm gjatë pasdites u arrit të vihen nën kontroll të plotë flakët të cilat gjatë orëve të fundit kanë shkaktuar djegie sipërfaqësore.
Nga hetimi paraprak dyshohet se zjarri ka qenë i qëllimshëm dhe po punohet për identifikimin dhe arrestimin e autorëve. Nga zjarri që përfshiu masivin pyjor të fshatit Neshtë janë dëmtuar me qindra pisha dhjetra vjeçare dhe një sipërfaqe me barishte.
