Pas një gare të ashpër deri në fund, Italia ka fituar Eurovision 2021. Grupi italian “Maneskin” me këngën “Zitti e buoni” është vlerësuar me 524 pikë nga juria profesioniste dhe publiku.
“Rock and roll nuk vdes kurrë”,- është shprehur solisti i grupit “Maneskin” pas fitores.
Pas votave të jurive profesioniste nga të gjitha vendet pjesëmarrëse, fitues i të cilave doli Gjon’s Tears, votat e publikut rrëzuan të gjithë rezultatin në favor të Italisë.
Vendi i dytë shkoi për Francën, ndërsa vendi i tretë për Zvicrën, e cila u përfaqësua nga këngëtari shqiptar, Gjon Muharremaj.
Shqipëria, e përfaqësuar nga Anxhela Peristeri, është renditur në vendin e 21-të me 57 pikë në total nga publiku dhe juria profesioniste.
