Një kamion me targa të Kosovës është përmbysur rreth mesnatës në rrethrrotullimin e “Bishtit të Zhurit”, në Rrogozhinë, pika lidhëse mes autostradës Rrogozhinë-Peqin dhe Rrogozhinë-Durrës.
Kamioni i përmbysur ishte i ngarkuar me skrap, por fatmirësisht nuk ka pasur të lënduar në njerëz.
Policia mbërriti në vendngjarje, shoqëroi drejtuesin e mjetit për të sqaruar rrethanat e aksidentit dhe shkaqet përse ndodhi.
Megjithatë, nga hetimet paraprake mësohet se një nga shkaqet ka qenë mbingarkesa.
Edhe pse kanë kaluar shumë orë nga përmbysja e mjetit, ende nuk po ndërhyhet për lëvizjen e tij dhe për pastrimin e autostradës nga mbetjet e skrapit, të cilat janë përhapur në një sipërfaqe të madhe.
Mësohet se kamioni ishte duke shkuar drejt Kombinatit Metalurgjik në Elbasan.
