Detaje të reja kanë dalë në dritë për zhdukjen e 19 vjeçares Artemis Vasili, gjurmët e së cilës u zhdukën në mënyrë misterioze më 16 Tetor të vitit të kaluar në Greqi. Familjarët u alarmuan pasi u gjet kufoma e një femre brenda në valixhe, por rezultoi se trupi i pajetë i përkiste një 38-vjeçareje kineze.Anastasios Dougas , avokati i familjes, ka folur për median greke “Protothema” duke thënë se ka informacione se vajza 19 vjeçare po mbahet kundër vullnetit të saj nga dy burra dhe spekulon se mund të kenë bërë ndryshime të rëndësishme në pamjen e saj.
“Informacioni që kemi është se ajo po mbahet nga dy burra kundër vullnetit të saj. Në fakt, ata e kanë parë atë në Volos dhe Athinë, është saktësisht e njëjta dëshmi. Pas dimensionit që ka marrë çështja, mendoj se mund të ketë pasur disa ndryshime në pamjen e 19-vjeçares, mund t’i kenë prerë flokët, mund t’i kenë vendosur një paruke, nuk e di. Hetimet janë duke vazhduar dhe apeli ynë është që kushdo që di diçka, të flasë edhe në mënyrë anonime”, tha Dougas. Shpresat e familjarëve se fëmija i tyre do të kthehet në shtëpi janë rritur përsëri dhe bëjnë apelin që kushdo që ka informacion, ta deklarojë në mënyrë që autoritetet të shqyrtojnë cdo provë dhe të zgjidhin misterin e zhdukjes.
