Një 25-vjeçar shqiptar është arrestuar mbrëmjen e djeshme në Bolonja të Italisë për grabitjen e një shtëpie. Sipas mediave italiane, efektivët e policisë po ushtronin kontroll në zonën e Via Erbosa, pas raportimit për një motor të grabitur. Ata vunë re dy persona të cilët po ecnin në rrugë, dhe në momentin që panë policinë, filluan të shpejtojnë hapin.
Efektivët i bënë shenjë të ndalonin por ata filluan të vraponin dhe një prej tyre hodhi një çantë në tokë. Në çantë u gjetën disa bizhuteri argjendi dhe ari, të cilat rezultuan të vjedhura. Gjatë ndjekjes, policia arriti të arrestojë 25-vjeçarin shqiptar, ndërkohë që personi tjetër, ende i paidentifikuar, arriti të shpëtojë. Sipas policisë italiane, i riu është arrestuar dhe dëbuar më parë nga shteti fqinj për grabitje të banesave.
