Policia italiane ka vendosur në pranga një shqiptar për posedim dhe trafik kokaine. Shqiptari kishte kërkuar azil në Itali, ndërsa ndiqej vazhdimisht nga policia për lëvizjet e tij të dyshimta.
Ai kishte mbërritur në Pesaro disa muaj më parë, duke rifilluar aktivitetin e tregtimit të lëndëve narkotike të llojit kokainë; aktivitet për të cilin tashmë ishte hetuar në qytetin ku kishte qëndruar më parë.
Por kjo fundjavë nuk ka qenë me fat për shqiptarin. Ai ka dalë për të tregtuar kokainë duke qenë se blerjet në fundjavë janë edhe më të mëdha, por ka rënë në prangat e policisë.
Duke parë lëvizjet e shqiptarit, policia iu vu pas duke kryer kontroll edhe në shtëpinë e tij. Dhe pikërisht brenda dhomës së gjumit ata gjetën të mbështjellë rreth 21 gramë kokainë, e fshehura brenda çorapeve.
Gjithashtu policia gjeti materialin për paketimin e dozave si dhe një shumë parave prej 450 euro, e mbajtur si burim të ardhurash të veprimtarisë së tregtimit të paligjshëm.
Shqiptari u arrestua dhe u dërgua në Gjykatën e Pesaros ku u vendos masa e sigurisë, arrest shtëpie.
