Në progres-raportin e KE-së për vendet e Ballkanit Perëndimor që pritet të publikohet më 12 tetor nisja e negociatave për Shqipërinë dhe Maqedoninë e Veriut cilësohet si një moment historik në raportet e këtyre dy vendeve me Bashkimin Evropian.
Komisioni, sipas raportit të publikuar nga Radio Europa e Lirë, nënvizon se Shqipëria ka vazhduar luftën kundër korrupsionit në nivel të lartë dhe si shembull përmenden dënimet e disa ish-zyrtarëve të lartë. Megjithatë vendit tonë i kërkohet që të bëjë më shumë përpjekje në parandalimin e shpëlarjes së parave.
Një çështje që Komisioni Evropian kërkon në mënyrë të veçantë në Shqipëri është angazhimi për të penguar emigrimin ilegal, sidomos të personave të mitur. Ndërkaq vlerësohet progresi në forcimin e strukturave për integrim në BE, por kërkohet që në këtë drejtim të ketë më shumë bashkëpunim me opozitën dhe shoqërinë civile. Aty nënvizohet se konflikti i madh i brendshëm me partinë më të madhe opozitare, Partinë Demokratike(PD,) ka ndikuar në jetën parlamentare në Shqipëri.
Për Maqedoninë e Veriut, thuhet se i ka vazhduar përpjekjet për forcimin e demokracisë dhe sundimin e ligjit, pavarësisht disa sfidave. Maqedonia e Veriut ka shënuar “një lloj progresi” në luftë kundër krimit të organizuar dhe korrupsionit.
