Avokati i Popullit ka bërë një bilanc të protestës së zhvilluar ditën e djeshme para selisë blu. Në një njoftim për mediat, Avokati i Popullit bën me dije se 59 persona, mes tyre 8 të mitur janë shoqëruar në polici. Po ashtu Avokati i Popullit ka dhënë informacion edhe për numrin dhe gjendjen e të shtruarve në spitale që u lënduan në protestë.
Avokati i Popullit ka bërë një bilanc të protestës së zhvilluar ditën e djeshme para selisë blu.
Në një njoftim Avokati thekson se në të gjitha komisariatet e kryeqytetit ishin shoqëruar në total një numër prej 59 qytetarësh nga të cilët 28 persona në Komisariatin nr.1, 14 persona në Komisariatin nr.2, 8 persona në Komisariatin nr.3, 5 persona në Komisariatin nr.5, 3 persona në Komisariatin nr.6 dhe 1 person në Drejtorinë e Policisë së Tiranës.
Të dhënat i referohen kohës së kryerjes së inspektimeve dhe situata vijon të jetë në dinamikë.
Ndërkohë sipas verifikimeve, Avokati i Popullit bën me dije se 8 ndër të shoqëruarit ishin të mitur. Për të miturit veprimet kryheshin me përparësi dhe ishin njoftuar familjarët për të qenë të pranishëm në momentin e pyetjes së tyre.
Të gjithë të shoqëruarit u kontaktuan nga përfaqësuesit e Avokatit të Popullit dhe nuk rezultuan prej tyre pretendime për veprime të dhunshme të kryera gjatë shoqërimit apo kohës së mbajtur në komisariate, por ata kishin pretendime se nuk kishin kryer veprime të dhunshme, por ishin shoqëruar vetëm për pjesëmarrje në protestë.
Po ashtu Avokati i Popullit ka dhënë informacion edhe për numrin dhe gjendjen e të shtruarve në spitale që u lënduan në protestë. Mësohet se në Urgjencën e Spitalit “Nënë Tereza” kishin marrë trajtim për 5 persona, ndër të cilët 3 femra dhe një punonjës policie mashkull. Në total në spitalin Ushtarak dhe në QSUT sipas Avokatit kanë marrë shërbim në total 7 persona
