Është tensionuar disi situata në protestën para ministrisë së Arsimit, ku maturantët janë mbledhur sot pas provimit të Gjuhës Shqipe. Me thirrjet “eja mblidhuni këtu” dhe “arsim cilësor” maturantët vijojnë protestën para Ministrisë, ndërsa disa prej tyre kanë qëlluar me vezë në drejtim të godinës. Ata kërkojnë një përfaqësues të Ministrisë për të biseduar lidhur me shqetësimet e tyre.
Sipas tyre, testi i Gjuhës ishte ndërtuar në një mënyrë absurde, jashtë programit dhe përmbante më shumë pyetje logjike. Gjimnazistët të vendosur për të marrë një përgjigje u ulën këmbëkryq dhe bllokuan rrugën, ndërsa është njoftuar se do të mbahet edhe një peticion.
Maturantët kërkojnë sqarim nga ministrja e Arsimit. Ata nuk duan që ky test të ndikojë në mesataren e tyre ose të merren masa për ribërjen e testit.
