Drejtoria Vendore e Policisë së Durrësit vijon goditjet ndaj krimit mjedisor. Në vijim të punës për parandalimin, evidentimin dhe goditjen e krimeve mjedisore, shërbimet e Komisariatit të Policisë Shijak, në bashkëpunim me IKMT-në, kanë vijuar kontrollet në Gjepalaj, Shijak, ku u konstatua se mbetjet e një punishteje për përpunimin e qumështit derdheshin në ambient të hapur (tokë bujqësore), duke shkaktuar ndotje.
Nga specialistët për Hetimin e Krimeve në Komisariatin e Policisë Shijak u procedua në gjendje të lirë pronari i punishtes, shtetasi D.M., 33 vjeç, banues në Krujë. IKMT ka marrë masën admininistrative të dënimit me gjobë 2 milionë lekë ndaj subjektit, në lidhje me veprimtarinë e paligjshme të konstatuar. Gjithashtu në ambientet pranë objektit u konstatua dhe një ndërtim i paligjshëm. Materialet i kaluan Prokurorisë së Rrethit Gjyqësor Durrës, për veprat penale “Ndotja e ajrit” dhe “Ndërtim pa leje”
