Australia nuk gjen qetësi. Pas zjarreve që dogjën mijëra hektarë pyll dhe miliona kafshë, kontinenti përjetoi disa nga përmbytjet më të forta të dekadës. Tashmë, Australia ndodhet nën një tjetër kërcënim të natyrës, stuhitë e pluhurit. Erërat e forta në pjesën qendrore të rajonit New South Wales në Australi kanë krijuar stuhi pluhuri që në disa qytete e ktheu ditën në natë. Stuhitë e pluhurit erdhën pas erërave të fuqishme dhe reshjeve të mëdha të shiut në disa pjesë të vendit. Nga videot që qarkullojnë në internet shihen retë gjigante të pluhurit duke u përhapur në qytezën Dubbo dhe disa vende të tjera. Pluhuri ishte aq i dendur, saqë e bllokoi edhe depërtimin e rrezeve të diellit. Në rajonin Victoria, shërbimet emergjente kanë pasur rreth 1500 kërkesa për ndihmë pas stuhisë.
Meteorologët australianë kanë parashikuar se stuhia do të vazhdojë edhe të hënën dhe do të përcillet me erëra të fuqishme, shkruan “The Guardian”.
Narromine dust storm – Jan 19th pic.twitter.com/GeFSqby8NY
— Mick Harris (@mickharris85) January 19, 2020
