Kryeministri Edi Rama ka bërë me dije në konferencën për mediat se numri i testimeve të shpejta ka mbërritur deri në 83 mijë deri në këto momente.
Rama ka vijuar më tej duke qartësuar që Shqipëria ka arritur të sigurojë 1.6 milionë doza të vaksinës anticovid për 800 mijë qytetarë, teksa ka shtuar se vijojnë negociatat me kompani dhe shtetet të tjera për më shumë doza.
Rama: Kapacitetet laboratorike janë rritur katërfish dhe numri i testimeve është 10-fishuar në krahasim me muajin qershor. Testet e shpejta kanë hyrë në përdorim që ofrohen në 58 qendra testimi në komunitet, ku janë kryer 83 mijë teste.
Numri i epidemiologëve është rritur me 30%, duke garantuar që 90% e të dyshuarve të shikojnë dhe të izolohen brenda 48 orëve. Ky është një proces i vështirë, sfidues, proces ku ose jemi bashkë dhe secili bën detyrën e vet dhe dalim faqebardhë, ose turpërohemi bashkë për shkak të një thyerje të zinxhirit të stabilitetit.
Në 2013 kishte 0 vaksina për gripin, ndërkohë që ne kemi mundësuar vaksinën e gripit falas për 350 mijë qytetarë, 4 herë më shumë se në vitin 2019, për të gjitha kategoritë e rrezikuara.
Nga ana tjetër kemi siguruar vaksinën në kushte të pafavorshme për vendin tonë dhe kemi nisur fushatën e vaksinimit, duke u ndeshur si të gjithë me një vonesë për shkak të kërkesës globale ndaj Pfizer, sidoqoftë kemi siguruar 1.6 milionë doza për 800 mijë qytetarë nëpërmjet kontratës me Pfizer dhe Covax. Jemi në negociata me kompani të tjera vaksinash dhe me shtete të tjera.
