Dita Ndërkombëtare e Infermierit ka qenë një tjetër rast që kryeministri Edi Rama të formulonte vlerësime maksimale për infermierët shqiptarë në kohën e koronavirusit.
“Kurrë nuk ka qenë kaq ndërkombëtare dita e tyre! Infermierët që kemi parë me sy të trishtuar, me vragat në fytyrë prej turneve të gjata si luftëtarët e pamposhtur me Covid-19, na mësuan se hero të bën sakrifica. Mirënjohje çdo infermieri në Shqipëri”, shkruan zoti Rama në rrjete sociale.
Edhe Ministrja e Shëndetësisë dhe Mbrojtjes Sociale Ogerta Manastirliu ka formuluar falenderimin e saj.
“Kam një falenderim të përzemërt për secilin prej tyre, por edhe për çdo infermier të shërbimit shëndetësor, nga urgjenca kombëtare, në qendrat shëndetësore, poliklinikat e specialiteteve dhe spitalet nga veriu në jug, që shërbejnë me përkushtim çdo ditë të vitit. Infermierët e sistemit tonë shëndetësor!” shkruan zonja Manastirliu.
Nga ana e saj ministrja e mbrojtjes Olta Xhaçka ka shprehur “Falënderim dhe një përgëzim gjithësecilit për punën e jashtëzakonshme që keni bërë. Falë punës tuaj dhe bluzave të bardha në të gjitha strukturat shëndetësore janë parandaluar probleme që mund të ishin shkaktuar si pasojë e pandemisë”. “Me punën tuaj të jashtëzakonshme me kurajon dhe profesionalizmin që karakterizon gjithësecilin, ia keni dalë më së miri të parandalojmë probleme të tjera që mund të kishim pasur, nga çadrat e triazhit e deri brenda në spital ku vijon i gjithë procesi” ka thënë ministrja Xhaçka.
