Kryeministri Edi Rama deklaroi sot se përhapja e koronës është e pashmangshme, por masat shtrënguese mund ta ngadalësojnë virusin dhe t’i japin kohë sistemit shëndetësor për trajtimin e të gjitha rasteve”.
“Kur kancelarja gjermane Angela Merkel thotë se 70% e Gjermanisë do të preket, apo kur Boris Xhonson thotë se 60% e popullit britanik do preket, pavarësisht se shifrat duken alarmante, qoftë 60% apo 70& nuk është alarmante. Virusi prek shumë, sado masa të marrësh me kufij të hapur apo të mbyllur, me lëvizje shumë apo pak”, tha Rama.
Rama tha se “shumica e atyre që do preken do ta kalojnë pa asnjë shenjë”. “Ndër ata që kanë shenja shumica do ta kalojnë në shtëpi si një grip të zakonshëm, shumica e atyre që do të bëhen për spital do të shërohen. Por thënë të gjitha këto anë inkurajuese pozitive duhet ngulitur në mendje edhe dy gjëra të tjera. Masat shtrënguese mund ta ngadalësojnë virusin”, tha Rama.
Rama tha se “nëse nuk e ngadalësojmë përhapjen, numri i atyre që bëhen për spital është shumë më i madh se numri i shtretërve për t’u spitalizuar”.
“Këtë problem e kanë të gjithë, Amerika, Gjermania, Austria, Italia, ku siç e pamë sistemi ekselent i Lombardisë ra në kolaps. Masat shtrënguese na japim kohë, teksa bota po kërkon pa pushim ilaçin, temperaturat e motit do të rriten, që besohet se do ta dobësojnë forcën goditëse të këtij armiku të egër”, tha Rama.
Kryeministri theksoi se “të paktën javën e ardhshme do të kemi më shumë të infektuar se këtë javë dhe javën tjetër ende më shumë”. “Asnjë panik, sepse kësaj nuk i shmanget dot askush, është kurba e përhapjes ky virusi shfaqet, zhvillohet dhe shpërndahet. Por rritja e këtyre dy javëve kritike do të jetë shumë më e ulët se sa po të kishim vazhduar jetën normale. Vetëm javën e tretë, ne do të kemi mundësinë të shohim se ku kemi arritur ne dhe ku ka arritur armiku”, tha Kryeministri.
Ai theksoi se “jeta e re që sapo ka nisur nuk është si ato stërvitjet ushtarake në kohën e zborit, kur na zgjonin me alarm fallco për agresionin dhe na nisnin nga kodrat e Mamurrasit”.
“Kjo është një luftë e vërtetë me një armik të vërtetë që ka sulmuar mbarë njerëzimin dhe që ka aftësinë të godasë në mënyrë të frikshme sistemet e mbrojtjes shëndetësore të çdo vendi, pa asnjë dallim, sado i zhvilluar apo më pak i zhvilluar të jetë. Fati i luftës, numri i të plagosurve dhe viktimave varet se çfarë do të bëjmë ne të mbështesim njeri-tjetrin dhe sistemin shëndetësor në këtë luftë. Parulla e hershme qesharake: ‘I gjithë populli ushtar’ është motoja e domosdoshme e ditës sonë e imponuar nga padukshmëria totale e armikut. Të gjithë jemi ushtarë në ushtrinë më të çuditshme të historisë së luftërave të njerëzimit, e cila ka vetëm një lloj arme, durimin. Sa më tepër durim, aq më pak viktima do të numërojmë në një javë apo në një ditë, Ndaj miq, durim, durim, durim, duke u përpjekur të përfitojmë edhe pozitivisht nga disa të mira të kësaj të keqe të madhe”, tha Rama.
Në përfundim ai ndau edhe eksperiencën personale, kur theksoi se “bën ushtrime frymëmarrje joga dhe merr ushqim dy herë në ditë në harkun e 8 orëve, me 16 orë agjërim”.
