Rëndohet bilanci i të vdekurve nga koronavirusi në Itali, duke shkuar në 148. Lajmi është bërë i ditur nga mediat italiane duke cituar shefin e emergjencave civile, Angelo Borrelli.
Vetëm brenda 24 orëve të fundit kanë vdekur 41 persona. Po ashtu edhe numri i të prekurve është rritur duke shkuar në 3 296 në të gjithë Italinë, ndërsa të shëruar janë 414.
Shkollat dhe universitetet në Itali do të qëndrojnë të mbyllura për të paktën deri me 15 mars për të shmangur përhapjen e virusit ndërsa të moshuarve u është kërkuar që të qëndrojnë në shtëpi.
Në Greqinë fqinje numri i të prekurve nga virusi i ri ka shkuar në 31. Frika për përhapjen e tij ka bërë që autoritetet të vendosin mbylljen e shkollave, universiteteve, teatrove, ambienteve publike argëtuese në Patra dhe zonën e Ahaia, Ilia dhe ishullin Zakinthos deri në 6 mars.
Ndërkaq numri i personave të prekur dhe i viktimave është rritur edhe në Shtetet e Bashkuara të Amerikës. Pas Uashingtonit dhe Floridas edhe Kalifornia ka shpallur gjendjen e emergjencës, pas vdekjes së parë nga coronavirusi në këtë shtet, duke e çuar në total numri e viktimave në 11 në SHBA.
