Zbulimi i një pikture të shekullit 13-të të artistit të famshëm Cimabue në kuzhinën e një gruaje në Francën veriore mahniti botën e artit dhe qeveria vendosi ta klasifikojë si një thesar kombëtar. Franca ka ndaluar nxjerrjen e “Christ Mocked” për 3 muaj jashtë vendit për të marrë kohën e duhur për mbledhjen e fondeve që ta blejë për kombin e vet.
E gjetur në shtator, piktura u shit në ankand një muaj më vonë për 24 milion euro. Vepra e artit, vetëm 20.3 cm e gjatë dhe 28.5 cm e gjerë, u vu re nga një drejtuese ankandi gjatë një vizite në banesën e një gruaje të moshuar pranë qytetit të Compiegne. Gruaja ishte rreth 90-vjeç dhe ishte transferuar në një azil pleqsh, kështu që po bëhej inventari para se shtëpia e saj të boshatisej. Philomene Wolf zbuloi pikturën që varej mbi një pllakë në kuzhinë. Pronarët mesa duket mendonin se bëhej fjalë vetëm për një ikonë ruse, ngjyrat e së cilës ishin zbehur ndër vite. Por nuk e dinin që në shtëpi kishin një thesar. Vlerësuar nga ekspertët në Paris, vepra u identifikua si një pikturë e Cimabue dhe më pas doli në ankand. /Ora News.tv/
