Këshilli bashkiak i Durrësit miratoi sot vijimin e procedurave të prishjes së dy pallateve dhe 86 ndërtesave individuale në njësinë administrative Manëz. Në mbledhjen e këshillit bashkiak të zhvilluar me mjete të komunikimit elektronik u miratua vijimi i procedurave të prishjes së detyruar të pallatit nr. 14, zk nr. 8514, me nr. pasurie 1/362, bulevardi “Dyrrah”, Durrës, pallatit ndodhur në zk nr. 8513, me nr. pasurie 5/979/nd, rruga “Dalip Peza”, lagja nr. 17, si dhe 86 ndërtesave individuale, pronë private, të ndodhura në njësinë administrative Manëz, në zbatim të ekspertizave të thelluara të hartuara nga Instituti i Ndërtimit, Tiranë.
Ndërkohë që në qytetin e Durrësit vijon operacioni i rindërtimit ku sot është shembur konvikti i shkollës së mesme sportive “Benardina Qeraxhi” në Durrës i dëmtuar në mënyrë të pariparueshme nga tërmeti i 26 nëntorit. Prishja e tij i hap rrugën ndërtimit të një konvikti të ri me të gjitha kushtet bashkëkohore për nxënësit.
