Drejtësia ishte në qendër të dokumentarit të transmetuar në Kryesinë e Kuvendit në ditën e dytë të Festivalit të Filmit për të Drejtat e Njeriut. Në fjalën e tij, kreu i kuvendit Gramoz Ruçi apeloi për një drejtësi të bazuar mbi ligje dhe jo në hakmarrje.
Në shfaqjen e dokumentarit “Paqe përmes drejtësisë” i fokusuar në trashëgiminëe sistemit të drejtësisë që la gjyqtari Thomas Buergenthal, kreu i Kuvendit Gramoz Ruçi u shpreh se drejtësia vihet me ligje dhe jo me hakmarrje.
Në fjalën e tij, Ruçi theksoi se ligjet e drejta e bëjnë të dobëtin të fortë.
Ruçi: Ligjet e drejta e bëjnë të dobtin të fortë, të pambrojturin të mbrojtur, të padrejtin të drejtë, të pavërtetin të vërtetë dhe ato e shpëtojnë jetën njerëzore nga agresionet, dhuna dhe rreziqet.
Ambasadori i OSBE-së, Bernd Boschard, kujtoi dhe viktimat e komunizmit në Shqipëri.
Boschard: Gjithnjë ekziston pyetja sesi të përballemi me krime të së kaluarës kur shtetet lëvizin nga sistemet totalitare qofshin ato komumniste apo fashiste, si mund të përballemi me një të kaluar djallëzore dhe cila është forma më e mirë për tu përballur me një të kaluar djallëzore që ndihmon në krijimin e një rendi të ri liberal? Si të kenë drejtësi viktimat, si të krijojnë një rrëfim të ri më çlirues? Duke parë dhe duke folur për këtë film rreth mesazheve të tij mbi përgjegjshmërinë dhe llogaridhënien nga këndvështrimi im është një hap transformues. Do të thotë që ende ka diçka që mund të diskutohet nga përfaqësuesit e shoqërisë shqiptare.
Në ditën e dytë të Festivalit Ndërkombëtar të Filmit për të Drejtat e Njeriut, dokumentari “Paqe përmes drejtësisë” hodhi dritë mbi jetën dhe trashëgiminë e gjyqtarit Thomas Buergenthal.
