Autoritetet thonë se “Sputnik V” është 100% e efektshme Vaksinimi në masë i popullsisë kundër koronavirusit me vaksinën ruse “Sputnik V” do të nisë në fund të këtij viti ose në fillim të vitit të ardhshëm.Aleksandër Gintsburg, drejtues i institutit Gamaleja në Moskë që zhvilloi këtë vaksinë, thotë për mediat vendase se kjo vaksinë është 100% efektive. Sipas Gintsburgut, vaksina mbron të vaksinuarit nga të gjitha sasitë e dozave të virusit me të cilat ata mund të jenë përballur. Kreu i institutit Gamaleja thotë se vaksina është në fazat përfundimtare të testeve, gjatë të cilave synohet të vërtetohet se vaksina nuk jep efekte anësore të rrezikshme. Sipas tij, Sputnik-V e ka vërtetuar këtë.
Të shtunën, revista prestigjoze shkencore Lanset publikoi një raport ku flitej për rezultatet pozitive të kësaj vaksine. Kjo trumpetohet edhe nga kreu i institutit Gamaleja. Megjithatë, në shkrimin e kësaj reviste citohen vetëm rezultatet e publikuara nga Ministria ruse e Shëndetësisë, që për OBSH-në janë prova të pamjaftueshme për t’i dhënë zyrtarisht Rusisë trofeun e vaksinës së parë kundër COVID-19 në botë. OBSH, por edhe qeveri e ekspertë të ndryshëm në Perëndim, hedhin dyshime për efektshmërinë e vaksinës, pasi thonë se Sputnik –V nuk i ka përfunduar ende të gjitha provat kilinike dhe autoritetet ruse janë nxituar në regjistrimin e kësaj vaksine. Injektimet e para të vaksinës do të nisin në Tetor me kategoritë më të rrezikuara.
