Merr fund seria e ndeshjeve pa fitore të Atletiko Madrid. Skuadra e Diego Simeones kishte barazuar tre sfida radhazi, por i ka dhënë fund kësaj serie sot përballë Atletik Bilbaos, për t’u kthyer përsëri në kreun e renditjes së kampionatit të cilin e ndan me Barcelonën.
Korrea ishte njeriu-asist në takimin e sotëm. Fillimisht ai dhuroi pasimin për golin e 1-0 të shënuar nga Saul në pjesën e parë të ndeshjes. Ndërsa në të dytën, me një pasim të përkryer i krijoi mundësinë Moratas që të dyfishonte shifrat e të siguronte këtë fitore të rëndësishme për skuadrën madrilene.
Kështu, Atletiko ngjitet në kuotën e 19 pikëve, po aq sa Barcelona e vendit të parë e cila këtë fundjavë e bëri pushim për shkak të shtyrjes së “El Clasico” me Realin. Megjithatë, të dy skuadrat mund të kalohen nesër nga një prej surprizave më të mëdha të sezonit, Granada, e cila ka 17 pikë, apo të arrihen nga Sociedad e Sevilja që kanë nga 16.
