Naftëtarët në qytetin e Ballshit ndodhen përpara ambienteve të uzinës pasi ditën e sotme është dhe afati i fundit i vendosur për rifillimin e punës dhe nënshkrimin e kontratave individuale. Sipas tyre ata janë në pritje të një grupi juristësh dhe ekonomistësh që janë duke ardhur nga Tirana për firmosjen e kontratave dhe rifillimin e punë. Për kamerën e televizionit FaxNews një prej protestuesve më aktivë u shpreh se duhet një zgjidhje sa më e shpejtë pasi naftëtarët duhet të çojnë në shkollë fëmijët e tyre për pak ditë dhe të ardhurat e tyre janë të pamjaftueshme.
“Duke marrë shkasë nga lidhja telefonike që kemi bërë me drejtuesit e firmës, sot është afati i fundit që na është premtuar lidhja e kontratave individuale për punëtorët. Deri në këto momente ne na është thënë që një grup juristësh dhe ekonomistësh është nisur nga Tirana me qëllim lidhjen e kontratave. Ne e theksojmë gjithmonë me forcë se kërkesat tona janë të panegociueshme deri në të gjitha pikat e arritshme, pra dhënia e pagave të prapambetura, rifillimi i punës dhe pagimi i sigurimeve shoqërore. Ne do të vazhdojmë në qëndresën tonë, pasi çdo familje naftëtari ndodhet në prag të fillimit të vitit shkollor dhe ne duhet t’i ulim fëmijët në bankat e shkollës. Mos pasja e të ardhura ekonomike bën që ne të jemi në vështirësi”- u shpreh një naftëtar për kamerën e FaxNews.
