“Miqtë e Fëmijëve” organizoi mbledhjen e rradhës dhe ministrja e Arsimit, Sportit dhe Rinisë, Besa Shahini mori pjesë në takimin e radhës së grupit parlamentar i cili synon të jetë një zë i fuqishëm i mbrojtjes dhe avancimit të të drejtave të fëmijëve dhe të rinjve.
Aktiviteti synon paraqitjen e masave të mëtejshme për zbatimin e “Agjendës së Fëmijëve” dhe përmbushjes së Rezolutës së Kuvendit mbi Fëmijët.
“Është filluar me zbatimin e standardeve të mësuesit dhe përgatitjen e programeve të kualifikimit për mësuesit, për të vijuar me trajnimet e mësuesve, drejtuesve të rrjeteve profesionale dhe drejtuesve të institucioneve të arsimit parashkollor për kurrikulën dhe programet e reja. Janë hartuar dhe miratuar Standardet Profesionale të Formimit të Përgjithshëm të Mësuesit të Arsimit Parashkollor dhe ka filluar zbatimi në vitin shkollor 2018-2019”, tha ministrja Shahini.
Ajo theksoi se rreth 3,000 mësues të arsimit parashkollor janë trajnuar për paketën e arsimit parashkollor. Gjithashtu është në rritje përfshirja e numrit të fëmijëve rom/egjiptianë dhe me aftësi të kufizuara në kopësht.
“Ndërhyrjet e deritanishme për gjithë-përfshirjen përfshijnë regjistrimin e fëmijëve rom/egjiptianë edhe pa dokumentacionin e kërkuar me ligj; frekuentimin e kopshtit prej tyre pa asnjë tarifë. Ndërsa për herë të parë është futur mësuesi ndihmës në kopsht”, u shpreh Shahini.
Për sa i përket integrimit të fëmijëve e të rinjve romë/egjiptianë në kopshte, shkolla e universitete, Ministrja Shahini theksoi faktin se kanë vlerësuar me përparësi lehtësimin e integrimit të tyre duke zbatuar politika arsimore, të cilat u kanë krijuar këtyre komuniteteve shanse të barabarta për një qasje pozitive ndaj shkollës.
Në lidhje me “Planin e Veprimit për Arsimin Gjithëpërfshirës” për arsimin e fëmijëve me aftësi të kufizuara, Ministrja Shahini theksoi se tashmë në sistem kemi të përfshirë rreth 900 mësues ndihmës me qëllim rritjet e aksesit në shkollë për këtë kategori, teksa numri i mësuesve ndihmës parashikohet të shkojë deri në 1,000 deri në fund të këtij viti shkollor.
Në përfundim të fjalës saj, ministrja u shpreh se ngelet akoma shumë punë për t’u bërë, gjithsesi arritjet e deritanishme në drejtim të gjithë-përfshirjes dhe realizimit të barazisë në arsim janë një bazë e mire.
