Shtetet e Bashkuara të Amerikës shprehin edhe njëherë vendosmërinë për të çuar deri në fund zbatimin e reformës së re në drejtësi dhe vendosjen e të korruptuarve para ligjit. Zv/ shefi i ambasadës së SHBA në Tiranë, Dan Koski tha se për zyrtarët e korruptuar, ndryshimi që ne po sjellim është një lajm i keq.
“...jo të gjithë ndajnë qëllimet tona për të përmirësuar zbatimin e ligjit dhe qeverisjen e mirë në Shqipëri. Për zyrtarët e korruptuar, ndryshimi që ne po sjellim është një lajm i keq. Është si rëra në ingranazhe, e cila shumë shpejt do bëjë që aktivitetet e tyre korruptive të ndalen. Ne e dimë se ata do të luftojnë dhe do të përpiqen në çdo moment të bllokojnë përpjekjet tuaja për të çuar përpara këto qëllime të rëndësishme. Mos u stepni.
Por zyrtari i lartë i ambasadës së SHBA-së në Tiranë kishte edhe një këshillë për qeverinë shqiptare. “Donatorët nuk do të dhurojnë përgjithmonë. Sfida e Qeverisë së Shqipërisë do të jetë mobilizimi gjithnjë e më i madh i burimeve të saj kombëtare për të përparuar këto synime të rëndësishme zhvillimi.
Vazhdoni të qëndroni në këmbë dhe të luftoni për reformat që do të forcojnë shoqërinë e Shqipërisë për ju dhe brezat e ardhshëm. Ju besoni në një të ardhme më të ndritshme për Shqipërinë. Kështu bëjmë ne, dhe ne do të vazhdojmë të jemi partneri juaj ndërsa realizoni atë qëllim” përfundoi ai.
