Një tjetër aksident ka ndodhur në ambientet e punës ndërtimore në Shqipëri. Kësaj here aksidenti ka ndodhur në lagjen nr.5 në Durrës, ku gjatë punës në një godinë është shkëputur krahu i viçit të betonieres, duke lënë të lënduar kësisoj shtetasin 49 vjeçar të identifikuar me inicialet P.D. Policia njofton se 49 vjeçari është dërguar me urgjencë në spitalin e traumës në Tiranë dhe ndodhet jashtë rrezikut për jetën.

Njoftimi i policisë:

Më datë 09.09.2019, në lagjen Nr.5, Durrës gjatë punës është shkëputur krahu i vinçit të betonieres për ngjitjen e betonit në katet e larta dhe është lënduar një punëtor,  shtetasi P.D., 49 vjeç,  banues në Durrës, i cili  ndodhet në Spitaline Traumës në Tiranë jashtë rrezikut për jetën. Grupi hetimor po punon për sqarimin e  rrethanave të ngjarjes.

Kujtojmë se javët e fundit në Shqipëri ka patur një sërë incidentesh në kantieret e punës në ndërtim, ku vetëm disa ditë më parë në Tiranë, si pasojë e rënies së skelave, humbën jetën dy punëtorë.