Ditën e sotme qeveria shqiptare ka marrë vendimin për hapjen e shkollave në shtator, pavarësisht shifrave të larta të infektimeve dhe viktimave nga koronavirusi. Sipas ministres së Arsimit, Besa Shahini nxënësit do të ndahen në grupe të vogla nëpër klasa, duke e zhvilluar mësimin me turne.
Ministrja Shahini bëri me dije se nga sondazhi i zhvilluar mes nxënësve, mësuesve dhe prindërve rezultoi se 87% e tyre dëshironin kthimin në shkolla dhe vetëm 13% ishin për vijimin e mësimit online. Sa i takon rrezikut nga koronavirusi, Shahini tha se do të merren masa për ruajtjen e shëndetit të nxënësve dhe mësuesve. “Ne duam t’i hapim shkollat për të gjithë nxënësit e arsimit parauniversitar, por sipas specifikave që kanë shkollat”, tha ministrja mes të tjerash.
“Kemi disa skenarë për të rifilluar mësimin në disa shkolla. Probleme ka me shkollat e dëmtuara nga tërmeti, mund të bëhet me turne. Po ndjekim dhe shembujt e shumë vendeve për hapjen e shkollave. Bashkitë duhet të fillojnë procesin e dezinfektimit të shkollave. Kemi parashikuar dhe mësim online për shkollat që do mbyllen”, u shpreh Shahini. Nga ana tjetër, Manastirliu tha: “Po punojmë për protokollet e sigurisë të cilat po detajohen. Kemi eksperiencën e deritanishme me hapjen e çerdheve dhe kopshteve. Çdo vendim do të udhëhiqet nga siguria e jetës së fëmijëve”.
