Tre gra kanë humbur jetën si pasojë e një zjarri të madh që shpërtheu në orët e para të mëngjesit të së hënës në fabrikën e njohur të biskotave “Violandë”, në qytetin Trikala të Greqisë.
Zjarri ka rënë pak para orës 04:00 të mëngjesit, pas një shpërthimi të fuqishëm, duke djegur një pjesë të madhe të objektit industrial. Sipas informacioneve paraprake, në zonën ku ndodhi shpërthimi ndodheshin pesë gra punonjëse.
Tre prej tyre janë gjetur pa shenja jete, ndërsa dy të tjera rezultojnë ende të zhdukura. Ndërkohë, pesë punonjës të tjerë dhe një zjarrfikës janë transportuar në spital për ndihmë mjekësore, por fatmirësisht ndodhen jashtë rrezikut për jetën.
Si pasojë e shpërthimit dhe flakëve, një pjesë e fabrikës është shembur. Punonjës të ndërmarrjes kanë deklaruar se shpërthimi është dëgjuar nga një sektor i fabrikës ku nuk ndodhen bombola gazi, të cilat ruhen në bodrum.
Për shkak të situatës, policia ka mbyllur rrugën Karditsë, ndërsa qarkullimi i automjeteve po devijohet përmes fshatit Agia Kiriaki, me qëllim lehtësimin e punës së ekipeve të shpëtimit dhe garantimin e sigurisë së qytetarëve.
Në vendngjarje po operojnë 40 zjarrfikës me 15 mjete zjarrfikëse, ndërsa janë angazhuar edhe njësitë speciale EMAK. Gjithashtu, në zonë ka mbërritur një ekip i EMAK nga Lamia dhe është dhënë urdhër për ndërhyrjen e Drejtorisë për Hetimin e Krimeve të Zjarrvënies (DAEE), për të zbardhur shkaqet e shpërthimit.
