Një shpërthim me tritol ka ndodhur pas mesnatës në zonën e Laprakës në Tiranë. Burime bëjnë me dije se sasia e lëndës plasëse është hedhur në oborrin e banesës së një 47-vjeçari, në momentin kur e gjithë familja ka qenë brenda në banesë. Fatmirësisht si pasojë e shpërthimit nuk ka pasur njerëz tëe lënduar por vetëm dëme materiale. Vijojnë hetimet për zbardhjen e ngjarjes dhe identifikimin e autorit.
Njoftimi zyrtar i policisë së Tiranës: Më datë 21.07.2020, rreth orës 01:05 të mengjësit, në Laprakë, në derën e jashtme të banesës së shtetasit GJ.LL., 47 vjeç, ka shpërthyer një sasi e vogël e dyshuar si lëndë plasese, duke shkaktuar vetëm dëme të vogla materiale. Grupi hetimor dhe shërbimet e Policisë vijojnë punën për zbardhjen e rrethanave të ngjarjes, identifikimin dhe kapjen e autorit.
Policia ka marrë dëshminë e kryefamiljarit i cili thotë se nuk ka asnjë konflikt.
“Kam 15 vite që jetoj këtu në Laprakë. Nuk kam konflikt me asnjë këtu” u shpreh Llazi në një prononcim për median.
Gazetari Besar Bajraktaraj, duke iu referuar burimeve nga policia raporton se Llazi është person me precedentë penalë në vjedhjen e makinave. Në momentin kur ka ndodhur shpërthimi në banesë kanë qenë të 4 pjesëtarët e familjes: 47 vjeçari, bashkëshortja dhe dy fëmijët. Grupi hetimor dhe shërbimet e Policisë vijojnë punën për zbardhjen e rrethanave të ngjarjes, identifikimin dhe kapjen e autorit.
