Pas njoftimit nga pala greke në pikën kufitare të Kapshticës, mjetet e tonazhit të rëndë kanë shmangur këtë doganë, duke përdorur pikat e tjera të kalimit kufitar me Greqinë, deri në normalizimin e situatës. Moti i paqëndrueshëm, me reshje bore që përfshiu qarkun e Korçës, e kanë bërë të pamundur lëvizjen e mjeteve të tonazhit të rëndë në këtë pikë kufitare, pasi prezenca e akullit dhe e ngricave do të dominojë gjatë këtyre dy ditëve. Ndërkohë, përsa ju përket autoveturave dhe autobusëve, ata shprehen për News24 se, janë informuar mbi njoftimin e policisë kufitare dhe se janë të pajisur të gjithë me zinxhirë, të cilat do t’i përdorin në rastet e nevojshme.
Nga ana tjetër, fluksi i madh i mjeteve është bërë i dallueshëm që prej mbarimit të festave me largimin e emigrantëve drejt shtetit grek. Edhe pse ka pasur fluks, drejtuesit e mjeteve thonë se falë punës së policisë kufitare është bërë e mundur lëvizja e mjeteve të tyre, duke mos krijuar pritje të gjata. Gjatë 24 orëve të fundit kanë hyrë 3527 shtetas dhe kanë dalë 5515 shtetas.
