Profesioni i berberëve nuk është vetëm për meshkuj, të paktën këtë ka vërtetuar edhe shqiptarja, Jesma Saliu, e cila e ushtron prej vitesh në shtetin e Zvicrës. Me origjinë nga Prilepi i Maqedonisë, Jesma Saliu së bashku me bashkëshortin e saj, Demirali Saliu, menaxhojnë biznesin e përbashkët, një sallon, ku meshkujt janë klientët dominues.
Jesma Saliu është ndoshta femra e vetme shqiptare berbere për meshkuj. Por jo vetëm kaq. Ajo është ndër berberet më të mira në Zvicër, kurse ka fituar në shumë gara edhe në Evropë. Jesma rrëfen se zanatin e berberit e ka trashëguar nga babai i saj, i cili ka qenë berberi i parë në Sion. “Këtë zanat e kam marrë nga babai të cilin e kam berber. Mua më ka pëlqyer ky zanat dhe kam filluar të punoj te babai. Ka 15 vite që e punoj këtë zanat. Unë jam nga Maqedonia, më saktë nga Zhitosha e Prilepit”, tha për Lajm.tv, berberja Jesma Saliu. Edhe pse babai ka qenë kundër që bija e tij të trashëgojë këtë zanat, Jesma ka qenë këmbëngulëse.
