Seanca e dytë në Gjykatën e Lartë për ish-kreun e bandës së Durrësit Lulzim Berisha ka dështuar, shkruan newsbomb.al. Avokatët mbrojtës të tij nuk kanë marrë pjesë sot dhe seanca e rekursit është shtyrë, për një datë të dytë brenda muajit nëntor.
Rekursi në Gjykatën e Lartë është bërë nga Prokuroria e Durrësit, e cila ka kërkuar që të prishet vendimi i Gjykatës së Apelit, e cilia në vitin 2016 e nxori Lul Berishën në liri me kusht. Prej atëherë, nga ish-kreu i bandës së Durrësit nuk ka më asnjë gjurmë.
Seanca e radhës, e cila është e treta në radhë pasi dy të parat kanë dështuar, u caktua më 23 nëntor, ora 09:30.
Prej disa muajsh është i shpallur në kërkim për vrasjen e Klodian Saliut dhe Vajdin Lamajt, pas hetimeve që ka kryer Prokuroria Speciale SPAK. Lul Berisha qëndronte në burg për vepra të tjera penale, ndërsa tashmë kërkohet dhe për dy vrasjet e mësipërme.
Sot, anëtarët e Gjykatës së Lartë vendosën qe të përsëriten njoftimet për paraqitjen në seancë të avokatit, dhe kërkuan që të caktohet një tjetër mbrojtës ligjor kryesisht, për shkak se dy seancat e para kanë dështuar pikërisht për këtë arsye. Gjykata e Lartë në seancën e kaluar la edhe disa detyra dhe kërkoi të merrte informacion nga Prokuroria e Durrësit, nëse Berisha mbante kontakt me shërbimin e provës apo jo. Nuk dihet nëse organi i akuzës ka arritur të marrë informacion apo jo, pasi ky shtetas është në kërkim dhe është e pamundur të ketë kontakt me Shërbimin e Provës.
