Një zbulim arkeologjik i jashtëzakonshëm ka ndodhur në Sllovaki, ku një banor i zonës në fshatin Hubinë gjeti nën tokë disa kupa të veçanta, me përmbajtje të lartë bakri, të cilat mendohet se janë të lara me flori të kuq.
Por ajo që e bën të veçantë këtë zbulim, por njëherësh të mbushur me mister, është origjina e tyre.
Sipas arkeologëve, nga inspektimi i imtësishëm, në brendësi të njërës prek kupave është shquar mbishkrimi “Albania”, inicialet dhe një numër.
Arkeologët shpjegojnë se këto enë janë përdorur në liturgjinë kishtare, ndërsa origjina e tyre ballkanike konfirmohet edhe nga punimi karakteristik dhe motivet në këto kupa.
Por ata nuk kanë mundur t’i japin përgjigje pyetjes se si kanë përfunduar këto enë kishtare nga Shqipëria në pyllin e fshatit Hubina, në Sllovakinë e largët. Edhe pse përflitet se ka të ngjarë që këto enë, si dhe shumë thesare të tjera të çmuara, të kenë rënë në duart e gabuara, të trafikantëve.
Gjetjet iu dorëzuan Zyrës Rajonale të Monumenteve të Trnavës, ndërsa specialistët kërkuan me detektorë metalikë te i njëjti vend, por nuk gjetën sende të tjera, shkruan në njoftimin e saj Zyra e Monumenteve të Republikës së Sllovakisë.
Nga ana e tyre, arkeologët sllovakë besojnë se do të arrijnë të zbulojnë edhe më tepër rreth origjinës së objekteve, ndërsa iu kanë kërkuar banorëve të zonës, që nëse kanë gjetur objekte të ngjashme, t’i dorëzojnë.
