Ministria e Drejtësisë është ngjyrosur me portokalli mbrëmjen e kaluar, duke iu bashkuar kështu fushatës kundër dhunës ndaj grave.
Ministria e Drejtësisë u ndriçua me portokalli, jo për festat e fundvitit, por për një kauzë madhore, siç është fushata kombëtare e 16 ditëve të aktivizmit kundër dhunës me bazë gjinore dhe dhunës në familje me temë “Bëje botën portokalli: Më dëgjo dhe mua”.
Fushata sensibilizuese, e cila është shoqëruar me një sërë aktivitetesh gjatë muajit dhjetor ka pasur në fokus të saj thirrjen për t’i dëgjuar dhe besuar gratë dhe vajzat e dhunuara, për t’i dhënë fund kulturës së të heshturit dhe për t’i vënë ato në qendër të reagimit. Sipas të dhënave më të fundit, nga rastet e raportuara në Shqipëri, 74% e të dëmtuarve nga dhuna në familje janë gra.
Ministrja Gjonaj edhe më herët është angazhuar në aktivitetet e kësaj fushate, ndërsa pak ditë më parë në një konferencë kombëtare kundër dhunës ndaj grave bëri të ditur edhe qëndrimin e saj të vendosur, për të mos lejuar që asnjë i dënuar për dhunë në familje apo krime seksuale të përfitojë nga amnistia e fundvitit që pritet të miratohet së shpejti.
