Forcat operacionale ekzekutuan mesditën e sotme (31 mars 2022) urdhërarrestin për Alqi Bllakon, i cili një ditë më parë dha dorëheqjen nga mandati i deputetit socialist.
Mësohet se Bllako ka qëndruar në banesë në pritje të ekzekutimit të vendimit të Gjykatës së Posaçme.
Bllako është shoqëruar në Drejtorinë Vendore të Tiranës së bashku me avokatin e tij. Ditën e nesërme pritet që të njihet me masën e sigurisë së dhënë ndaj tij.
Bllako, akuzohet për “Shpërdorim të detyrës” në bashkëpunim dhe “Korrupsion pasiv i funksionarëve të lartë shtetërorë”.
Sipas Prokurorisë së posaçme Bllako në bashkëpunim me ish Ministrin e Mjedisit Lefter Koka dhe një tjetër zyrtar të Ministrisë, ku ai ka patur detyrën e Sekretarit të Përgjithshëm, kanë përgatitur dokumentacion të falsifikuar në lidhje me të dhënat e pronës së shpronësuar, për ndërtimin e inceneratorit të Fierit, duke ndryshuar cilësimin nga “arë” në “tokë truall”, duke rritur vlerën e shpronësimit.
Po ashtu ai dyshohet se ka favorizuar shoqërinë përfituese të koncensionit, në këmbim “të përfitimeve të parregullta” me një vlerë prej afro 150 mijë dollarë, të cilat kanë shkuar në formën e pagesave të larta mujore për babanë e tij, i punësuar pranë incineratorit të Tiranës.
Kërkesa e Prokurorisë për arrestimin e tij, ishte pjesë e 14 urdhërave të tjerë të arrestit ndaj funksionarëve lokalë dhe anëtarëve të Komisioneve të Koncensionit për incineratorët e Elbasanit dhe Fierit, përfshirë për herë të dytë ish ministrin Koka dhe sipërmarrësin Klodian Zoto, që zotëronte 70 përqind të aksioneve në inceneratorin e Fierit.
