Pas deklaratës së presidentit, Ilir Meta, për një tërmet apokaliptik që mund të godasë Ballkanin, ka ardhur edhe reagimi i parë nga qeveria.
Ministrja për Marrëdhniet me Parlamentin, Elisa Spiropali, ka thumbuar kreun e shtetit duke i përmendur dekretet, të cilat kanë qenë të shpeshta nga ana e tij me shtyrje zgjedhjesh, caktim e ç’caktim datë zgjedhjesh, kthime ligjesh e propozime emërimesh.
Spiropali ka cituar një batutë nga reagimet në rrjet për deklaratën e presidentit, duke i kërkuar Metës të shtyjë me dekret tërmetin sepse ka lënë njerëzit pa gjumë.
“Baba Xhike të kemi rixha, nxirr një dekret e shtyje atë tërmet se na le pa gjumë Kjo ishte batuta më e bukur e rrjetit për parashikuesin e parë në botë të tërmetit”, thotë ministrja në një postim në rrjetet sociale, të cilin e shoqëron edhe me disa figura duke qeshur me lot.
Shqiptarja.com kontaktoi ekskluzivisht edhe me sizmiologun grek që citoi Meta, duke e cilësuar qesharake deklaratën e kreut të shtetit.
