Derbi i Romës është mbyllur me një barazim 1-1 që i jep fund edhe serisë së fitoreve radhazi të Lacios në kampionat duke ndalur përkohësisht marshimin e saj kërcënues drejt Juventusit e Interit. Ka qenë një ndeshje e vendosur nga dy episode të çuditshme që kanë parë si Strakoshën, ashtu edhe homologun e tij Lopez të bëjë gabime duke i dhënë mundësinë kundërshtarëve të shënojnë. Fillimisht ishte Strakosha ai i cili me një dalje të gabuar në minutën e 26 të sfidës i dha mundësinë Xhekos që të shënonte golin e avantazhit. Por pak minuta më vonë, Lopez bëri një gafë edhe më të madhe duke mos larguar e kontrolluar sferën, me Açerbin i cili u tregua i shkathët të shtynte topin në rrjetë.
Barazimi 1-1 mbijetoi deri në fund të sfidës, por Strakosha në pjesën e dytë shleu gabimet me pritje vendimtare për t’u mohuar verdhekuqve festën e golit. Barazimi mban Lacion në vendin e tretë me 46 pikë, ndërsa Roma e ndjek me 39, duke ndjerë tashmë nga pas edhe presionin e Atalantës.
