TIRANË, 18 dhjetor /ATSH/ – “Për një hark kohor 1 ose 2 vite dhe në bazë të një procesi të hapur konkurrimi, studentët shqiptarë me potencialin më të lartë do të përfitojnë bursa në ndjekje të studimeve master në Shtetet e Bashkuara të Amerikës”, deklaroi sot gjatë seancës parlamentare ministrja e Arsimit, Sportit dhe Rinisë Besa Shahini. Ajo shtoi se, “e mira e këtij memorandumi është që kandidatët të kthehen në Shqipëri për të paktën 2 vite pasi të përfundojnë programin, të sjellin gjithë eksperiencën që kanë marrë në SHBA dhe të kontribuojnë në sektorin privat dhe atë publik”.
Shahini theksoi se, “ky program ka nxitur marrëdhëniet dypalëshe që shtetet dhe qeveritë e tjera punojnë me SHBA për të vendosur prioritete për të formësuar programin dhe përmbushur nevojat e përbashkëta. Ky program sjell një kontribut shtesë dhe të padiskutueshëm edhe në forcimin e marrëdhënieve dypalëshe mes Shteteve të Bashkuara te Amerikës dhe Shqipërisë”. “Duke marrë parasysh që SHBA është një partner strategjik i Republikës së Shqipërisë ky forcim i marrëdhënieve është një kontribut shtesë në gjithë këtë proces që kemi ndërtuar me ta dhe ju ftoj që ta votojmë projektligjin që aprovon memorandumin e mirëkuptimit”, përfundoi ministrja Shahini. /a.a/j.p/
