Ministria e Bujqësisë dhe Zhvillimit Rural ka nisur evidentimin e dëmeve në kulturat bujqësore, pas rrebeshit të ditës së kaluar në fshatin Stëblevë të Librazhdit.
Stuhi me erëra të forta dhe breshër, në madhësinë e një arre, goditën mbrëmjen e së enjtes zonën e Stëblevës në Librazhd, duke shkaktuar dëme të mëdha në kulturat bujqësore.
Taulant Balla, kryetar i grupit parlamentar të Partisë Socialiste, deputet i qarkut Elbasan, publikoi në rrjete sociale, foto ku shihen sipërfaqe të tokave bujqësore të fshatit Stëblevë mbuluar nga breshëri dhe një pjesë e konsiderueshme e kulturave bujqësore të dëmtuara.
“Stëblevë, Librazhd. Reshjet e mëdha të shiut dhe breshërit kanë shkaktuar dëme të mëdha në kulturat bujqësore në fshatin Stëblevë”, shkruan Balla.
Balla bëri të ditur se, ka komunikuar me ministren e Bujqësisë dhe Zhvillimit Rural Frida Krifca e cila në mënyrë të menjëhershme ka ngritur një grup pune për verifikimin e dëmeve dhe mbështetjen e bujqve të dëmtuar.
Zv.ministri i Bujqësisë Dhimo Kote, i kontaktuar me telefon nga ATSH-ja, tha se “grupi i ekspertëve të bujqësisë është në terren, për identifikimin e bilancit të dëmeve”.
Sipas tij, për momentin janë kulturat e patates, specit dhe kastravecit të mbjella në fushat e kësaj zone që janë prekur nga stuhia dhe për dëmtimet e konstatuara do të merren masat mbështetëse të kompensimit.
