Reshjet e dendura të shiut me erë të fortë dhe stuhi kanë shkaktuar përmbytje të shumta në disa qytete dhe bllokime të rrugëve. Qyteti i Laçit është përmbytur, po ashtu edhe disa fshatra në Krujë dhe në Fushë Krujë. Dëmet më të mëdha janë shkaktuar fshatrat e Krujës. Po ashtu edhe aksi Fushë – Krujë -Milot është bërë i pakalueshëm.
Autostrada Tiranë-Durrës është përmbytur nga Vora në Maminas duke bllokuar qarkullimin në këtë pjesë dhe për pasojë të gjitha automjetet janë të detyruar që të qarkullojnë nga rruga e vjetër. Ndërkohë që probleme ka pasur thuajse në pjesën më të madhe të qyteteve me rrëzime pemësh dhe rënie gurësh në akset kryesore, por qarkullimi vijon dhe situata nuk paraqitet e rëndë.
Probleme me rrugët në Rrëshen dhe Krujë, rrezik nga gurët, Derveni nën ujë
Krujë vijon që të jetë qyteti më problematik përsa i përket përmbytjeve. Edhe në Derven janë pushtuar nga uji disa banesa duke shkaktuar dëme të shumta. Ndërkohë që edhe rruga Rrëshen-Bukmirë dhe Balldre-Torovicë ka probleme të shumta nga rënia e gurëve. Lëvizja në këtë aks është e frikshme pasi rrezikojnë të bien gurë të mëdhenj duke përsëritur tragjedinë e dy viteve me parë ku humben jetën 3 persona.
