Drejtoresha e Shërbimit Social Shtetëror, Luneda Sufali ka reaguar mbi rastin e nënë Elefterisë të publikuar në median elektronike duke thënë se aktualisht e moshuara po merr shërbim shëndetësor pranë spitalit të Sarandës.
Teksa ka theksuar se ky rast është i njohur për institucionin e Shërbimit Social Shtetëror, Sufali ka informuar se prej shumë kohësh janë bërë përpjekje për sistemimin e gjyshes në një Shtëpi të Moshuarish ku mund të merrte përkujdes socio-shëndetësor me standarde të larta, por sipas saj, janë hasur me refuzimin e zonjës për t’u institucionalizuar.
“Ditën e djeshme në median elektronike u bë publik rasti i të moshuarës Elefteri Qendrothanasi nga Piqerasi. Shërbimi Social Shtetëror dhe strukturat vendore e njohin rastin dhe prej shumë kohësh kanë bërë përpjekje për sistemimin e gjyshes në një Shtëpi të Moshuarish ku mund të merrte përkujdes socio-shëndetësor me standarde të larta, por jemi hasur me refuzimin e zonjës për t’u institucionalizuar”, ka thënë Sufali.
Më tej, ajo ka vënë në dukje se “në kushtet ku zgjedhja për t’u sistemuar në institucion i takon qytetarit dhe të përballur me refuzimin e zonjës, Bashkia Himarë i ka caktuar zonjës si kujdestare kundrejt pagesës kunatën e saj. Zonja Elefteri trajtohet me pagesë invaliditeti dhe caktimi i kujdestarit është bërë me qëllim që e moshuara të marrë shërbimin në banesë, jo në mjedis të institucionalizuar”.
“Mbrëmjen e djeshme, ekipet tona nga Shërbimi Social dhe struktura vendore, me konstatimin e një gjendjeje të rënduar shëndetësore dhe higjieno-sanitare, kanë transportuar gjyshen në Spitalin e Sarandës ku po merr të gjithë kujdesin shëndetësor sipas nevojave të saj”, sqaroi ajo.
