Trajneri i Kombëtares, Sylvio Mendes Campos Junior së bashku me ndihmësit e tij Dorival Guidoni Junior dhe Pablo Zabaleta, kanë nisur sërish nga puna për të takuar nga afër lojtarët kuqezi që aktivizohen në Europë.
Të premten më datë 26 janar, Sylvinho dhe Doriva ishin në Frankfurt në stadiumin “Deutsche Bank Park” për të ndjekur nga afër ndeshjen Eintracht Frankfurt – Mainz dhe menjëherë më pas kanë udhëtuar në Itali, aty ku është bashkuar edhe Pablo Zabaleta. Sylvinho dhe ndihmësit e tij kanë takuar nga afër futbollistët shqiptarë që aktivizohen në kampionatin italian dhe kanë diskutuar për shumë tema, gjendjen e tyre, grumbullimin e radhës, sfidat miqësore dhe për Kampionatin Evropian “Gjermani 2024”.
Këto takime vlerësohet se janë mjaft të rëndësishme për teknikun kuqezi që ka mundësi të shohë nga afër gjendjen e disa prej lojtarëve të Kombëtares dhe të diskutojë me ta. Sakaq, Federata Shqiptare e Futbollit (FSHF) bëri me dije se “trajneri ka pasur komunikime të vazhdueshme me lojtarët dhe është në kontakt të vazhdueshëm me të gjithë futbollistët, teksa në vijim Sylvinho së bashku me ndihmësit e tij do të programojnë takime të tjera me futbollistët kuqezi”.
