Të rinj entuziastë dhe të talentuar kanë arritur të ngrenë sipërmarrje model në fushën e kreacionit artistik, duke u bërë kështu jo vetëm mjaft të kërkuar nga tregu, por edhe punëmarrës të suksesshëm. Ministri i Shtetit për Sipërmarrjen, Eduard Shalsi solli shembullin e dy vëllezërve, Faolti dhe Marini, të cilët kishin filluar punën me mjete modeste që kur ishin fare të rinj, 19 vjeç.
“Një kombinim i elektronikës dhe arkitekturës, çka ishin edhe profesionet e dy të rinjve punëdashës, bëri të mundur krijimin e një kompanie ku sot pas 13 vitesh numëron rreth 50 punëtorë”, shprehet Shalsi. “Më bëri përshtypje mjedisi modern i punës dhe i dizenjuar me shumë shije ku ofroheshin produkte të ndryshme që nga tabelat ndriçuese, printimet digjitale, stampime promocionale e shumë shërbime të tjera në fushën e reklamimit”, tha Shalsi. Megjithëse një industri e goditur nga pandemia, nuk mungonte energjia në këtë kompani. “Gjatë vizitës që zhvillova në këtë kompani, diskutuam së bashku mbi vështirësitë e biznesit, raportet me bankat, si dhe alternativa se si mund t’i vijmë në ndihmë kësaj industrie për t’u ringritur edhe më e fortë”, u shpreh Shalsi.ATSH
