Ish-ministri i Drejtësisë, Ylli Manjani, ka komentuar paketën e fundit Anti-KÇK dhe operacioni që po zhvillohet në rang vendi nga Operacioni Forca e Ligjit. Ai foli edhe për rastin e Vladimir Gjutës, që u arrestua pranë selisë së Partisë Socialiste, me një armë zjarri dhe 100 mijë euro. Manjani deklaroi në emisionin “Open”, në Top Channel, se e gjitha është veçse propagandë. Ndër të tjera ai paralajmëroi se nëse situata vijon kështu, ai e sheh të udhës për tu arratisur nga Shqipëria.
“E bëjnë si obobo si ja shikoni OFL çfarë bëhet. E gjitha një show, një propagandë e ndyrë. Rama po e bën çdo gjë PR, kulti i individit është ngritur në kulm në këtë vend, dhe nëse situata vazhdon kështu, më mirë të ikim nga ky vend. Të mbarojë emisioni e të ikim”, tha Manjani.
Gjuta fillimisht është pikasur nga rojet e Gardës që ishin pranë Selisë së PS, të cilët kanë tentuar ta ndalojnë atë sapo e kanë parë. Gjuta i cili në kokë mbante një kapele, ka kundërshtuar dhe në këtë moment atij i ka rënë pistoleta në tokë. Punonjësit e Gardës kanë njoftuar menjëherë policinë, të cilët më pas e kanë arrestuar. Ai u kap me pistoletë dhe me një shumë parash prej 100 mijë eurosh. Para oficerëve të policisë ka thënë se pistoletën e mbante për të ruajtur paratë që kishte me vete, dhe se ato do t’i këmbente pranë një pike “Exchange”.
