Në Televizionin Klan Plus nisi këtë të shtunë emisioni “E ardhmja është vajzë”, me moderatore Ermira Çaushollin. Ky emision i dedikohet figurës së vajzave, nënave, çdo gruaje e cila ka diçka për të thënë. Në këtë pjesë të parë ishte e ftuar Angi për të treguar historinë e trishtueshme të jetës së saj.
Babai vendosi të largohej nga Shqipëria për të punuar në Itali, kur ajo ishte ende fëmijë. Sigurisht prezenca shpirtërore e babait është e rëndësishme në jetën e fëmijëve, sidomos të vajzave, por dhe ajo fizike ka të njëjtën peshë.
Angi: Babi im prej shumë shumë kohësh ka emigruar dhe vazhdon të jetë në Itali. Në momentin e parë që ai zgjodhi të emigrojë, kemi qenë shumë të vegjël. Unë, vëllai dhe motra dhe mami po ashtu shumë e re. Sigurisht unë vëllai dhe motra kemi një diferencë me njëri-tjetrin prej 2 vitesh.
Besoj se ka qenë shumë e vështirë që asokohe, mosprezenca e tij fizike, por në asnjë moment mungesa e përkushtimit, ofrimi i dashurisë, apo kohës së tij. Gjatë viteve faktikisht kam kuptuar se sa më shumë rritesh, sa më shumë piqesh, aq më shumë i kërkon prindërit, aq më shumë do të rrish me ta aq më shumë do t’i dëgjosh zërin, t’i dëgjosh këshillat dhe mendoj se bëhet akoma më e vështirë.
Momentalisht jam 23 vjeçe dhe e shoh që është shumë e vështirë për mua që babi vazhdon të jetë andej. Kur është e vështirë për mua si fëmijë, e imagjinoni dot sa e vështirë do të jetë për mamin?! Për një grua që prej kaq shumë vitesh, rri bashkë me fëmijët, por që prezenca e burrit është diçka shumë e madhe./tvklan.al
