Kush është Uljan Kolgjegja? 39 vjeçari i cili tentoi të vetëdigjej sot para ambienteve të kryeministrisë është një personazh karizmatik dhe jo krejtësisht i panjohur për publikun shqiptar. Në gjendje të rënduar psikologjike Kolgjegja tentoi të vetflijohej para ambienteve të kryeministrisë, pasi në shkelje të rregullave të qarkullimit rrugor, policia i kishte hequr patentën dhe si rrjedhojë nuk mund të ushtronte detyrën e tij si taksist.
Ky akt është parandaluar nga forcat “Shqiponja” duke e shoqëruar 39-vjeçarin në komisariat. Mirëpo Kolgjegja rezulton të jetë një personazh “VIP” pasi më herët është përmendur dhe janë bërë mediatike dy akte të tij në dukje të çuditshme.
Uljani një adhurues i flaktë i Sali Berishës, duke shprehur kështu admirimin e tij për ish-kryeministrin me foto të tij të bërë tatuazh në gjoks. 39 vjeçari asokohe u bë viral në rrjetet sociale duke siguruar edhe një foto me idhullin e tij. Më vonë duket se është penduar për këtë veprim duke e mbuluar tatuazhin e Berishës më një tjetër figurë.
Por kjo nuk është “çmenduria” e vetme e Uljanit. Bërja tatuazh e idhujve dhe personazheve të tij të preferuar vazhdon me Marina Vjollcën, duke bërë sërish tatuazh por kësaj radhe një foto të saj në krahun e majtë. Nëse rrugëve të Tiranës keni parë një taksi me foto të personazheve të njohur dijeni se taksisti ka qënë Uljani. 4 vite më parë 39 vjeçari kishte modifikuar taksinë e tij me foto të Presidentit Trump, duke iu bërë thirrje shqiptarëve të votonin për të edhe pse zgjedhjet zhvilloheshin në SHBA.
