Studentët e Fakultetit të Shkencave, kanë dalë në një deklaratë për mediat, ku kanë theksuar se bojkoti do të vazhdojë derisa të plotësohen kërkesat e tyre.
Ata kanë ftuar që edhe stafet e universiteteve të tjera të bashkohen me ta, duke mos u bërë alibia e kryeministrit Rama. Ky i fundit shprehet se kërkesat e studentëve janë plotësuar.
Studentët kanë kërkuar sërish plotësimin e kërkesave dhe draftimin e një ligji të ri për arsimin që t’i nxjerrë nga kriza ekonomike, institucionale dhe vlerore.
Komunikata e studentëve:
“Bojkoti do të vazhdojë deri në plotësimin e plotë të kërkesave studentore. Prej më shumë se një muaj studentët e universiteteve publike janë hedhur në lëvizje për plotësimin e kërkesave bazike për një jetë studentore dhe akademike të dinjitetshme.
Nga bojkoti në protesta dhe nga protestat në bojkot, ky muaj ka kulmuar pakënaqësinë studentore të mbledhur ndër vite me pakënaqësinë e arsmit publik në vend. Nga fillimi i hapjes së pakontrolluar të universiteteve private në vitin 2005, deri te masivizimi i diplomave pa standarte akademike si në universitete publike ashtu edhe ato private. Qeveria e kulmoi këtë përkeqësim universitar me ligjin e ri të arsmit në vitin 2015.
Në momentin kur diploma u bë mall si në universitete private ashtu edhe ne ato publike, qeveria me ligjin e ri për arsmin e lartë nuk e zhbëri këtë tendencë, por e thelloi me një ligj i cili ia shton sanksionet shtetërore universiteteve publike. Ligji i ri për arsmin e lartë nuk i bën publike universitetet private por i trajton si private edhe universitetet publike.
Fakulteti i Shkencave Sociale ka nisur një jetë universitare mes studentësh dhe profesorësh me diskutime dhe propozime për nxjerrjen nga kriza të arsimit të lartë në vend. Bojkoti ynë aktiv vë në pah faktin se nuk ka dalje nga kriza dhe reformim të arsimit të lartë pa angazhimin e studentëve dhe pedagogëve të universiteteve publike.
Ne ftojmë çdo kënd t’i bashkohet bojkotit aktiv dhe të marrë pjesë në këtë jetë të re universitare deri në plotësimin e kërkesave studentore. Ky është edhe modeli sesi qeveria duhet të operojë në vazhdim: të plotësojë kerkesat tona dhe t’ia lërë përgjegjësinë universiteteve që të fillojnë një diskutim mbarë universitar dhe publik për propozimin dhe draftimin e një ligji të ri për arsimin që na nxjerr nga kriza ekonomike, institucionale dhe vlerore.”
