38-vjeçari shqiptar, i cili humbi jetën pas aksidentit tragjik në Itali, është identifikuar si A.Meçaj.
Ndërsa, dinamika e gjithë ngjarjes, nga ndjekja e policisë te transporti i kokainës me vlerë 1 milionë euro, është zbardhur nga mediat italiane.
Ndjekja vdekjeprurëse
Sipas asaj që raportojnë mediat italiane, policia ka qenë në pritë për Arbër Meçajn, pasi kishin marrë informacione se ai dhe bashkëpunëtori i tij italian, po transportonin drogë.
Sapo policia ka parë mjetin e 38-vjeçari shqiptar që ishte pa targa dhe po afrohej, ka ndezur sirenat e alarmit. Në këtë moment, ka filluar arratisja nga Meçaj, i cili në vend që të ndalonte u largua me shpejtësi në një Fiat 500 L përgjatë Via Santa Maria Goretti, duke e përfunduar udhëtimin e tij në Via Spaventa.
Për Mecajn, i cili mbante një çantë me 23 blloqe kokaine, nuk kishte asgjë që mund të bëhej. Ai vdiq menjëherë. Fiat 500 L doli nga rruga, duke u përplasur me forcë me një shtyllë dhe duke u përmbysur.
Sipas asaj që doli nga një fazë fillestare e hetimit, e cila synon gjithashtu të sqarojë dinamikën e saktë të ndjekjes, e gjithë ngjarja zgjati rreth 30 minuta.
Trupi i Arbër Meçajt është transferuar tashmë në Institutin e Mjekësisë Ligjore të Poliklinikës Tor Vergata ku do të kryhet autopsia.
